Last Modified: January 10 2016 14:43:49.
 ബോംബെ...ബോംബെ...ബോംബെ
സാഗരദേവത മുടിയില്‍ ചൂടിയ
സൌഭാഗ്യ നവരത്നഹാരം
സ്വര്‍ഗവും നരകവും ഹൃദയത്തിലൊതുക്കിയ
സുന്ദര ഭീകര നഗരം (ബോംബെ)

മദകരമന്മഥ ലീലകളൊരിടം
മദിരോത്സവങ്ങളൊരിടം
പൊരിയുന്ന ഹൃദയവും എരിയുന്ന വയറുമായ്
നീറുന്ന ജീവികളൊരിടം (ബോംബെ)

മൂകമാമധരം മുദ്രിതഹൃദയം
മുന്നില്‍ പൊയ്മുഖ വലയം
ആശകളടിയുന്ന പ്രേതകുടീരം
അദ്ഭുത മാന്ത്രികനഗരം (ബോംബെ)

വെളുത്ത രാവും മരവിച്ച പകലും
വേര്‍തിരിച്ചറിയാത്ത ലോകം
കാലത്തിന്‍ ചലനങ്ങള്‍ തുടര്‍ന്നേപോകും
കദനങ്ങള്‍ പൂവിടും, കനിയാകും ( ബോംബെ)